طرقة عمل محشي الكوسة

السلام عليكم جميعا ،،،

أسعد الله أوقاتكم


اليوم حبايبي بسوي معاكم محشي الكوسا بطريقتي الخاصه ..!! وتراها طريقه لذيذه ..

واللي بيجربها بيدعي لي ....

وألحين خلونا نبدأ بالمقادير ....





كوسا حسب عدد أفراد الأسره نحفرها ونشيل اللي داخلها مثل الصوره تماما .



وهذا أرز مصري تقريبا ثلاث كاسات كبار تنقعينه بالماي وتخلينه ،،



نقطع بصلتين متوسطات و طماطتين قطع صغيره مثل ما شايفين مع فلفل أخضر حار ،،



شوية أعشاب جميله تعطي رائحة زكيه للطبخه وطعم جميل (بقدونس ، كزبرة ، شبت) . ،،،



وهنيه مجموعة بهارات جميله (كمون ناعم ، كزبره ناعمه ، كركم ، بزار عربي ) .،،



وهنيه شوية كوسا من اللي طلعته من حفر الكوسا أستخدمه في الصوص اللي راح اطبخ فيه الكوسا ،،




ألحين حبايبي خلصنا المقادير ونبدأ بالطريقه ....

أول شي ببدأ اسوي الحشو اللي بحشي فيه الكوسا هنيه أنا سويت الأرز المصري بروحه ...
حسب الذوق ممكن اللي تحب تستخدم دياي أو لحم مفروم في الخلطه ،،




(( ليصلك كل جديد أرسل الرقم  1 الى - 81428 للإتصالات السعودية  - 601428 لموبايلي - 701428  زين ))


مثل ما شايفين قبل لا أحط الزيت في الجدر أحط كمون وفلفل حار مجفف او يابس وأحمسه لحد ما تطلع
ريحته الجميله ،، وعقب أحط الزيت ،،



احط البصل وأحمسه لحد ما يذبل ،،



بعد ما ذبل البصل أعق عليه الطماط والأعشاب الخضره ومجموعة البهارات وقفشتين
صلصة طماطم وطبعا ملح ،،



عقب أصب عليه كاس ماي وأخليه يغلي شوي لحد ما يصير الخليط ثقيل ،،



عقب أعق العيش المصري ع الخليط وأقصر ع النار وأحرك الخليط زين لحد ما يتجانس مع بعض
وأغطي عليه وأخليه ع النار تقريبا عشر دقايق مع التقليب المستمر لحد ما نحس ان الأرز لان
شويه ،،



وهنيه هذي الحشوه اللي بحشي فيها الكوسا صارت جاهزة ،،،



نحشي الكوسا بالحشو اللي حضرناه ،،،


ألحين أبدأ أجهز الصوص اللي بطبخ فيه الكوسا ،، وانا عاد اسمحوني ما صورت الكم كيف لكنها
سهله والكل راح يعرف يسويها ...

مثل ما تعودنا نحط في الجدر الكمون الخشن مع الفلفل اليابس لحد ما تطلع ريحته ،، وعقب نحط
الزيت وعقب نعق البصل ، بعد ما يذبل البصل نعق الكوسا اللي طلعناها أثناء حفرالكوسا
يعطي طعم جميل للصوص ونحركه لحد ما يذبل شويه بعدين نحط عليه الطماط وشويه
من الأعشاب الخضره ونحركه لحد ما يتجانس الخليط ونعق عليه نفس البهارات اللي
فوق وأحط مكعبين ماجي (ماجي خضروات ألذ وأطعم من ماجي الدياي) وعقب تذوبين
شوية تمر هندي (صبار) في ماي دافي وتصبينه ع الخليط للي تحب الطعم الحاذق ..؟؟!
وعقب تصبين أكثر عن أربع كاسات ماي عشان تحصلين على صوص كافي
لطبخ الكوسا وتحطين الملح وتخلينه لحد ما يغلي وعقب تستخدمينه حق الكوسا،،


وألحين نطيخ الكوسا المحشيه كالتالي ....



أقطع الطماط حلقات وأحطه في قاع الجدر اللي بطبخ فيه الكوسا ، أما البطاط أقطعه بالطول أو حسب
ما تحبين وأقطع الفليفله بعد بالطول ،،



عقب أصفهم جيه في الجدر ،،



بعدين أصب عليهم الصوص أو الصالونه اللي سويتها وأغطي ع الجدر وأحطه ع الغاز على نار
متوسطه في البداية عقب أقصر ع الغاز وأخليه يطبخ على راحته ،، لا تستعيلي عليه خليه على راحته
حتى تضمنين ان الأرز المصري اللي داخل الكوسا ينضج بطريقه جميله ،،



وأخيرا حبايبي هذي النتايج .......





هني وعافيه ع قلوبكم يارب ،، وسامحونا ع الاطاله ،،